കവിയോട്

കെ.എസ്.കെ.തളിക്കുളം

ഇവനു പാടുവാൻ രചിക്കുമോ കവേ

ഭവാനൊരു നവമനോഹരഗീതം

പഴിക്കയല്ല ഞാൻ പലപ്പൊഴും മുമ്പ്

പലരും പാടിയ പഴയ പാട്ടുകൾ

ലളിതകോമളപദാവലികളി-

ലൊളിച്ചുവെച്ചെന്നെച്ചതിക്കാൻ നോക്കേണ്ട

മുറയ്ക്കലങ്കാരം നിറച്ചാലായതിൽ

ഭ്രമിക്കും ഞാനെന്ന് നിനയ്ക്കയും വേണ്ട

മതിമുഖിയുടെ മൃദുലഹാസത്തിൽ

പൊതിഞ്ഞതിന്നൊരു പുതുമ ചേർക്കണ്ട

ഇവനു പാടുവാൻ രചിക്കുമോ കവേ

ഭവാൻ സ്വതന്ത്രനായൊരു നവഗീതം

അതുകേട്ടാലെൻ്റെ സിരകളിൽക്കൂടി

അതിവേഗം രക്തം തിളച്ചു പായണം

ഉടനിവൻ ധീരഹൃദയാവേശത്താ-

ലടിമച്ചങ്ങല മുറിച്ചെറിയണം